Helgin var góð, og svolítið lengri fyrir 3/4 hluta fjölskyldunnar en undirritaða. Þessa vikuna er haustfrí í skólanum og m.a.s. lokað á skóladagheimilinu í dag þannig að börnin voru heima með pabba sínum og höfðu það gott. Í gær fórum við í sund, Kristinn er orðinn mjög öruggur og frakkur enda búinn að vera í sundnámskeiði og fer svo í framhald eftir jól. Svo voru Hlynur, Haukur og Einar Gunnar í heimsókn hjá okkur eftir sund, Arna er á Fróni að aðstoða við (les: stjórna) kosningabaráttu Þorbjargar vinkonu sinnar (framboð í 4. sæti hjá Sjálfstæðisflokknum í Rvk).
Svo var farið með ungana í klippingu í dag - svolítið erfitt að halda í síðu greiðsluna sem Kristinn vill hafa (því hann vill fá afríkufléttur eins og Anton Örn var einu sinni með) og koma því til skila til hárgreiðslumeistarans. Hann er eiginlega orðinn stutthærður núna og fattaði það áðan...var miður sín í svona 2 mínútur þangað til mér tókst að færa rök fyrir því að hann væri í raun enn síðhærður. Þessi stúdentapólitíkurþátttaka borgar sig aftur og aftur...
Annars er eigandi stofunnar greinilega ánægður með að hafa okkur í kúnnahópnum, vinur hans kom inn á stofuna áðan og sagði stundarhátt: "frétti að þú værir kominn með lækna í kúnnahópinn, bara algjör kóngur!".
Ég er á leiðinni til Köben á fimmtudaginn að hitta Drífu og mömmu, við eyðum helginni saman og eigum eftir að hafa það alveg svakalega gott. Mamma er þegar komin út að vinna forvinnuna.
Svo er agalega gaman að geta sagt frá því að Ásgeir og Dísa eru búin að eignast lítinn prins, öllum líður vel og eru alsælir. Til hamingju aftur!
lifið heil

Svona lítur Kristinn út í skólanum sínum.

þið hélduð að ég væri...

...búin að missa dampinn er það ekki?... nei alls ekki kæru vinir, staðreynd málsins er sú að ég bregst agalega vel við hrósi - og komment ykkar við síðustu bloggum hvetja mig meir en ykkur grunar (hint,hint).
Ég og Sigurður Yngvi maðurinn minn læknir fengum þá flugu í hausinn í vikunni að kaupa okkur hús hinum megin við götuna. Það er á þremur hæðum með bílskúr, pall, garð, nuddbaðkar, snyrtilegasta þvottahús sem ég hef séð, halogenlýsingu og geðveika eldhúsinnréttingu. Svo var í því eins borðstofuborð og við eigum, Kossinn eftir Gustav Klimt í hjónaherberginu (eins og hjá okkur) og eins baðsápa og við eigum! Við töldum þetta skýr skilaboð til okkar um að kaupa húsið. En bankarnir í Svíþjóð eru ekki jafnvogaðir (les: gráðugir) og þeir íslensku, hér ríkir hin alræmda sænska varkárni og forræðishyggja, þeir vilja ekki lána manni 35 milljónir bara sí svona. Kannski ekki slæmt í okkar tilfelli þar sem einnig má lýsa húsinu svona: byggt 1948, þarf að gera við þakið eftir 2-3 ár, það er á ÞREMUR hæðum, garðurinn snýr í norður og því sólarlítill og svefnherbergin öll frekar lítil. En á heimili okkar er nú glasið yfirleitt frekar hálffullt en hálftómt og því erum við alsæl með að hafa komist svona vel inn í bankakerfið, viss um að finna eitthvað ennþá flottara og hentugra næst með sól allan sólarhringinn og Malin í Nordeabankanum mun GEFA okkur peninginn fyrir því! Svona getur maður verið heppinn.
Á döfinni: vampíruveisla í skólanum á morgun, börnin verða bæði vampírur, Kristinn með hvítar sjálflýsandi vampírutennur en Katla með bleikar! Svo er plan helgarinnar að fara með drenginn í klippingu, hann er að nálgast Björn Borg í greiðslu þegar sá var upp á sitt besta (BB er reyndar með sömu greiðslu í dag, segir meira um hann en tískuna...). Katla er komin með æði fyrir fléttum og er núna alltaf með fléttur í leikskólanum sem fer henni mjög vel. Vill líka alltaf vera í nærbolunum utanyfir peysurnar sem fer henni líka vel af því hún bara svo falleg þessi stelpa.
Að lokum vil ég óska Drífu systur minni og orkubúnti til hamingju með endurkjörið sem ritari Vinstri Grænna og með að 24. október skuli hafa heppnast svona ofboðslega vel (hún var í undirbúningsnefndinni). Ég horfði á sjónvarpsfréttir á netinu og fékk gæsahúð yfir því hvað þátttakan var mikil, ágætiskomment í fréttunum að kannski hefði mátt hnika til umferðinni og almenningssamgöngum frá Lækjartorgi fyrir 50000 manna fund (lögreglan tók það ekki í mál skilst mér). Áfram stelpur!
lifið heil

ýmist í ökkla eða eyra þetta blogg...

Það var ekki annað hægt en leyfa sturtumyndinni að fljóta með!

Við fórum í siglingu með pabba og Gunní út að Grand Hótel (tignarlega byggingin í bakgrunninum) um miðjan september. Vorum mjög heppin með veðrið og Katla þorði í fyrsta sinn í túttuna sem er dregin á eftir bátnum okkar, var svo búin að fá nóg eftir 5 mínútur. Hún ætlar að verða frakkari en mamma sín í þessum efnum.















Svo var komið að Kristni sem hélt sér í túttunni og vildi hraðar hraðar og meiri beygjur, afanum var nóg um!












Kristinn og Katla voru að máta vetrarfötin áðan. Þrátt fyrir að enn sé 10 stiga hiti á daginn og fyrsta frostið hafi bara gert vart við sig sl. nótt, þá borgar sig að tékka á öllum græjum. Svíinn verður búinn að hreinsa allan vetrarbúnað úr búðunum eftir uþb 2 vikur. Við erum sum sé að fatta þetta þremur árum eftir innflutning!

Katla bloggar

Ég dansa ballett á laugardögum. Katla Sigurðardóttir SNÆDAL og Eyrún Jóhannsdóttir dansa ballett. AMMA SIGGA er best í heila heiminum. Afi Jón og afi Kristinn er besti afi í öllum heiminum. AMMA ÁSTA er best í heila heiminum.
Við höfum gerið Harry Potter hús úr LEGO og ég og Kristinn hefi gerið allt húsið. Kristinn sparkaði í mig og sagði farðu upp þá (úr baði). Amma Sigga rugludallur.
bæ

Mallorca

Katla Snædal (4) og Ingibjörg Thoroddsen (3) skemmtu sér vel á Mallorca...

Eru þau ekki æðisleg...?! Katla töffari, Tommi töffari og Kristinn töffari í góðum fíling eftir hamborgara og ís við ströndina.

Kæru vinir og vandamenn/konur, þetta er auðvitað að missa svolítið tilgang sinn þetta blogg ef maður þarf að senda út póst til að benda á nýtt blogg því allir eru hættir að kíkja á bloggið af því það er aldrei neitt blogg að sjá. O sei sei, þýðir ekki að spá í það.
Stutt rapport: börnin eru orðin stærri og með síðara hár en í ágúst. Kristni finnst hann m.a.s. svo stór að í dag tilkynnti hann að hann ætti að fá vikupening, eða mánaðarpening nú eða árspening. Hann er enn ekki búinn með afmælispeningana síðan í sumar, hefur svona verið að saxast á þá með kaupum á Yo-gi-oh (jógíjó) spilum en enn eru eftir 3000 íslenskar krónur. Er farið að gruna hann um að fylgjast með genginu því nú fær hann auðvitað meira fyrir peninginn þegar hann skiptir í banka pabba og mömmu heldur en hann hefði fengið í sumar (er einhver ykkar með honum í plottinu?).
Katla missti Mallorcafléttuna í síðustu viku, allt í einu lá fléttan með hárstráum stingandi út á endanum á koddanum hennar, og skallablettur eftir á höfðinu... agaleg sorg auðvitað því þetta var stolt hennar en Kristinn sá um að hugga og sýndi hvernig hún gæti fest þetta aftur með spennu. Hann er bestur þegar Katla er í krísu, huggar hana eins og enginn annar.
Annars var smá systkinakrísa um daginn þegar við vorum hjá Einari og Örnu. Börnin voru sest fyrir framan videóið og þá lýsti Katla því yfir að hún elskaði Hlyn svo mikið að hún vildi sitja hjá honum. Við það verður stóribróðir svo pirraður að lá við handalögmálum og kom skýringin þegar fullorðna fólkið skakkaði leikinn. "ef hún elskar hann þá elskar hún mig ekki lengur". Þurfti langa umræðu og rökræður til að komast til botns í þessu. Hann varð nú sáttur að lokum en þegar kemur að rökræðum við Kristin og vafamálum þarf maður orðið að hafa sig allan við. Hann var til dæmis kominn að þeirri niðurstöðu upp á sitt einsdæmi í vasapeningsmálinu (sjá ofar) að hann fengi þá viku eða mánaðarpening og þar með væri málið útrætt. Ég hélt í smástund að ég hefði lofað þessu og gæti ekki bakkað, án þess þó að hafa sagt um það orð. Minnti mig á afa Gunnlaug, sem á reyndar afmæli í dag!
Jæja góðir hálsar, feel free að setja inn comment, aldrei að vita nema það geti virkað hvetjandi á skrifin. Aldrei að vita sagði ég...
lifið heil