og enn fleiri myndir

Börnin voru með ábyrgðarhlutverk í athöfninni og alvarleg yfir því (og kannski öllu fólkinu sem var að horfa á þau), Kristinn rétti mömmu sinni hring brúðgumans og Katla rétti pabba sínum hring brúðarinnar.

Hér göngum við inn í salinn og má sjá spenntan veislustjórann í forgrunni, sjáið hvað fólk er ánægt okkar vegna, stórkostlegt!


...og við vorum ekki síður ánægð.

fleiri myndir

Margrét Sig. vinkona söng eftir sjálfa vígsluna "I just can´t stop loving you" eftir hinn fornfræga Michael Jackson sem að öðrum ólöstuðum á stóran þátt í því að við rugluðum saman reitum. Margréti tókst að flytja skemmtilegustu útgáfu sem heyrst hefur af þessu lagi með dyggum stuðningi Gumma sem poppaði upp harmonikkuna.



Hér stöndum við orðin herra og frú Kristinsson (eða Snædal, eftir smekk) og hlustum á Margréti og Gumma. Kona með reynslu (Tobba) var þarna búin að lána mér frakkann sinn, en þrátt fyrir að hafa montað mig af skipulagi okkar þá voru nokkur smáatriði sem gleymdist að hugsa út í eins og þetta. Sem betur fer tókst ljósmyndaranum að photo-shoppa burt bláu varirnar á aðalbrúðarmyndunum sem teknar voru úti í móa, niðri í fjöru og víðar.

myndir

Viðbrögðin létu ekki á sér standa, og það ber að verðlauna:


Kl 15.57 á brúðkaupsdaginn kom síðasta símtal fyrir athöfn frá stressuðum brúðguma í brúðarbílinn þar sem ef eitthvað var ríkti enn stressaðri stemmning. Símtalið varðaði lokaákvörðun um athöfnina: "við höldum hana úti". Og þannig varð það og við erum svo afskaplega ánægð með það og finnst mjög gaman að skoða myndirnar þar sem rokið gefur þeim skemmtilegan blæ, eruð þið ekki sammála? Fyrir þá sem ekki voru á staðnum má þarna sjá svaramenn okkar beggja ásamt Kalla frænda sem söng listilega "Dagný" eftir Sigfús Halldórsson ("er sumarið kom yfir sæinn, og sólskinið ljómaði um bæinn, þú birtist mér ástin mín bjarta....") við undirleik Gumma vinar. Kalli barðist hetjulega við rokið og við fundum ekki fyrir kuldanum á meðan við hlýddum á hann.

Þar kom að því

Hvar er hægt að byrja eftir svona viðburðarríkt sumar? Síðast þegar skrifað var á þessa síðu var í gæsaveislu minni og síðan hefur óneitanlega ýmislegt gerst. Undirbúningurinn að brúðkaupi (aldarinnar segja sumir...) var mjög skemmtilegur og er gaman frá að segja að okkur tókst að grafa upp hjá okkur báðum dulda skipulagshæfileika (mamma var mjööög hissa).




Sumarfríið heima var gott og við náðum að gera ýmislegt skemmtilegt sem ekki snerti brúðkaup okkar beint. Helgina eftir heimkomu fórum við í brúðkaupið (ok, ákveðinn snertiflötur) hjá Tobbu og Sveinbirni hennar. Það var í hæsta máta rómantískt brúðkaup með útiathöfn í sveitinni við Kirkjubæjarklaustur (sorrí ónákvæmnina Tobba mín, landafræðin er einn af þessum veiku hlekkjum í þekkingarkeðju minni). Svo var ofsalega skemmtileg veisla þar sem við nutum samvista við Siggu Sveins og fleiri hressa einstaklinga. Við Sigga stigum á svið og héldum ræðu kvöldsins að eigin mati, brúðinni svelgdist aðeins á henni en flest var innan siðsamlegra marka. Sjáið hvað þau eru glæsileg!: